Авторлар:
Сейдахметова Майнұр Садуовна, екпе бөлмесінің мейірбикесі
Рақымбаева Майра Мыңжасарқызы, жалпы тәжірибелі мейірбике
Саякова Айгүл Жарылқасыновна, жалпы тәжірибелі мейірбике
ШЖҚ «Райымбек аудандық ауруханасы» КМК
Кіріспе
Бүгінгі таңда әлем жұртшылығының алдында тұрған ең өзекті мәселелердің бірі – жұқпалы аурулардың таралуын болдырмау және қоғамдық иммунитетті сақтау. Бұл міндетті жүзеге асыруда денсаулық сақтау жүйесінің әрбір буынының, әсіресе мейірбикелердің рөлі ерекше. Мейірбике — екпе жүргізуден бастап, халыққа түсіндіру жұмыстарына дейін жауапты маман. Қоғамдық иммунитетті нығайту – тек медициналық қадам емес, бұл — әлеуметтік, адами, кәсіби жауапкершіліктің көрінісі.
Қоғамдық иммунитет дегеніміз не?
Қоғамдық иммунитет (немесе «ұжымдық иммунитет») – бұл халықтың белгілі бір бөлігі инфекцияға қарсы вакцина алған немесе ауырып иммунитет қалыптастырған жағдайда, аурудың таралу қаупі азаятын құбылыс. Басқаша айтқанда, егер қоғамда адамдардың басым бөлігі егілсе, онда инфекция жұғу тізбегі үзіледі, ал егілмеген немесе егілмейтін адамдар (жас нәрестелер, иммунитеті әлсіз жандар) да жанама түрде қорғалады.
Қоғамдық иммунитет не үшін қажет?
Аурудың кең таралуын тоқтату үшін;
Асқынулар мен өлім-жітімді азайту үшін;
Медицина жүйесіне түсетін ауыртпалықты жеңілдету үшін;
Қоғамның әлсіз топтарын (қарттар, балалар, жүкті әйелдер) қорғау үшін.
ЖРВИ, қызылша, қызамық, тұмау, COVID-19 сынды инфекциялар қоғамдық иммунитеттің деңгейіне тікелей тәуелді.
Мейірбикенің қоғамдық иммунитеттегі рөлі
- Вакцинация жүргізу
Мейірбике — вакцина егу процесінің тікелей орындаушысы. Ол екпе егу алдындағы тексеруді, инъекцияны енгізуді, вакцинаны сақтау мен тасымалдау ережелерін қатаң сақтайды. Сонымен қатар, егуден кейінгі асқынуларды бақылау да мейірбикенің міндетіне жатады. - Түсіндіру және ағарту жұмыстары
Көптеген адамдар екпе туралы толық ақпаратқа ие емес немесе жалған мәліметтерге сеніп жатады. Мейірбике осы жағдайларда дұрыс ақпарат беруші маман ретінде халықпен тікелей жұмыс жүргізеді. Ол егудің маңызын, қауіпсіздігін, тиімділігін түсіндіріп, ата-аналар мен ересектерге сенімді түрде кеңес береді. - Құжаттама және мониторинг
Мейірбике вакцинация деректерін жүйелі түрде тіркеп, бақылау тізімдерін жүргізіп, қай жас тобында қандай екпелер жасалғанын және кімге қандай ревакцинация қажет екенін анықтап отырады. Бұл – қоғамдық иммунитет деңгейін бақылау үшін аса маңызды. - Жауапкершілік пен сенім
Мейірбике жұмысының негізінде – сенім жатыр. Халық мейірбикеге тек ем жүргізуші ретінде емес, бағыт беруші, қолдау көрсетуші маман ретінде қарайды. Сондықтан мейірбике өзінің кәсіби біліктілігімен қатар, этикалық нормаларды да берік ұстануы тиіс.
Қиындықтарға қарамастан – алға
Соңғы жылдары қоғамда екпеге қарсы көзқарастар жиілеп барады. Бұл — жалған ақпарат пен үрейдің салдары. Мұндай жағдайда мейірбикенің кәсіби ұстамдылығы мен сабырлы түсіндіруі өте қажет. Жағымды қарым-қатынас, дұрыс ақпарат беру арқылы ғана халықтың сенімін арттыруға болады.
Қорытынды
Қоғамдық иммунитет – бұл ұжымдық қауіпсіздік қалқаны. Ал оны қалыптастыру мен сақтаудағы басты тұлғалардың бірі – мейірбике. Оның кәсібилігі, жанашырлығы мен жауапкершілігі бүкіл қоғамның денсаулығына әсер етеді. Әрбір екпе — тек ине емес, бұл — болашақтың қауіпсіздігіне жасалған қадам. Сондықтан да мейірбике өз ісінің маңызын сезіне отырып, қоғамдық иммунитеттің шынайы қорғаушысы бола білуі қажет.
