Қазақстан Республикасының Денсаулық сақтау министрлігі Apple компаниясының өкілдерімен тиімді келіссөздер жүргізіп, елде медициналық мониторингке арналған озық цифрлық қызметтерді іске қосты.
Бұл қызметтер бұрын Қазақстанда қолжетімсіз болып, АҚШ, Канада, Германия, Ұлыбритания және Аустралия сынды елдерде сәтті қолданылып келуде. Енді қазақстандықтар өз денсаулығын үнемі бақылап отыру үшін осы заманауи технологияларға қол жеткізе алады.
Apple құрылғыларының жаңа функциялары
Apple Watch-та ЭКГ жазу мүмкіндігі.
Apple Watch Series 6 және одан кейінгі модельдер иелері енді жүрек ритмін бақылап, ЭКГ жазу қызметін қолдана алады. Бұл функция 30 секунд ішінде жүрек фибрилляциясының белгілерін анықтауға көмектесіп, деректерді «Денсаулық» қосымшасында сақтайды, әрі оларды дәрігерге талдау үшін ұсынуға мүмкіндік береді.
Ұйықтау кезіндегі апноэ туралы ескертулер.
Apple Watch Series 9 және жаңартуларында ұйықтау кезінде тыныс алу бұзылыстарын, атап айтқанда апноэ эпизодтарын тіркеу мүмкіндігі қосылды. Бұл жаңалық түнгі тыныс алудың уақытша тоқтауы туралы ескерту жасап, созылмалы шаршау мен денсаулыққа қатысты басқа да мәселелердің алдын алуға септігін тигізеді.
AirPods Pro-дың жаңа есту функциялары.
AirPods Pro 2 және одан кейінгі моделдер «Естуді тексеру» мүмкіндігімен жабдықталды. Бұл функция әртүрлі дыбыс жиіліктері мен қарқындылығын бағалап, ерте кезеңдегі есту бұзылыстарын анықтауға бағытталған. Тестілеу бес минут шамасында жүргізіліп, нәтижелері iPhone немесе iPad-дегі «Денсаулық» қосымшасында сақталады. Сонымен қатар, «Есту аппараты» функциясы жеңілден орташа деңгейдегі есту жоғалтуы бар адамдарға арнайы бейімделіп, оларды қолдау мақсатында ұсынылады.
Ескертпе
Осы функциялар ауруды анықтауға немесе емдеуге толық негіз бола алмайтынын атап өткен жөн. Олар тек денсаулық жағдайын бақылауға арналған көмекші құрал ретінде қызмет етіп, кәсіби дәрігерлердің кеңестерін толық алмастырмайды.
Қазақстан Республикасының Денсаулық сақтау министрлігі азаматтардың денсаулығын жақсарту мақсатында заманауи технологияларды қолжетімді етуді жалғастыруда.
