2025 жылғы 11 маусымда жарияланған ресми дерекке сәйкес, Қазақстанда жыл сайын 800-ден астам балада алғаш рет онкологиялық және гематологиялық аурулар анықталады. Олардың шамамен 600-і қатерлі ісіктерге, соның ішінде гемобластоздарға, ал 200-ге жуығы ауыр, бірақ қатерсіз гематологиялық патологияларға жатады.
Соңғы он жыл ішінде балалар арасындағы қатерлі жаңа өскіндерге шалдығу деңгейі тұрақты сақталып отыр. Бұл көрсеткіш 100 мың балаға шаққанда шамамен 9,7 жағдайды құрайды.
Қатерлі ісіктердің құрылымы халықаралық тенденцияларға сәйкес келеді:
- Жедел лейкоздар – 30%-дан астам,
- Орталық жүйке жүйесінің ісіктері – шамамен 17%,
- Лимфомалар мен нефробластомалар – 10–11%,
- Нейробластомалар – шамамен 7%.
Заманауи емдеу тәсілдері – жоғары нәтиже
Иммунотерапия мен таргеттік терапияны қоса алғанда, заманауи медициналық технологияларды енгізудің нәтижесінде елімізде балалар арасындағы қатерлі ісіктерден аман қалу көрсеткіші 70%-дан асты. Бұл — диагностика мен емдеудің сапасын арттыру, заманауи препараттарды қолдану және мамандандырылған көмекке қолжетімділіктің артуының нақты нәтижесі.
Соңғы бес жылда 40-тан астам бала нейробластома, лимфома және лейкоз секілді ауруларды емдеуде моноклоналды антиденелерге негізделген инновациялық препараттар қабылдаған. Мұндай препараттар науқастардың иммундық жүйесін мақсатты түрде белсендіру арқылы ісік жасушаларымен күресуге мүмкіндік береді.
Болашаққа бағдар
Балалар онкологиясындағы бұл оң өзгерістер — денсаулық сақтау жүйесінің жүйелі реформалары мен жоғары технологиялық медициналық көмектің кеңеюінің нәтижесі. Алдағы уақытта да онкологиялық дертке шалдыққан балаларға жан-жақты қолдау көрсету, жаңа дәрілік заттарды қолжетімді ету және кадрлық әлеуетті арттыру – басты бағыттардың бірі болып қала бермек.
