Автор: Какаша Салиқа, ГКП на ПХВ Облыстық аурухана, реанимация бөлімі
Ауыр халдегі науқастарды күту – медицинадағы ең жауапты әрі күрделі салалардың бірі. Мұндай науқастар өмір мен өлімнің арасындағы жағдайда болғандықтан, олардың күтімі мен емдеу шаралары ерекше назарды талап етеді. Реанимация бөлімінде қызмет ететін әрбір маман пациенттің жағдайын қадағалаумен қатар, физикалық және психологиялық қолдауды да қамтамасыз етеді.
- Науқастың тыныс алуын қадағалау
Ауыр халдегі науқастар жиі тыныс алудың нашарлауынан зардап шегеді. Сондықтан олардың тыныс алуын тұрақты бақылап отыру қажет. Реанимация жағдайында науқастарға өкпені жасанды желдету аппараттары көмектеседі. Осы аппараттардың дұрыстығын, тиімділігін қадағалау, тыныс алу жолдарын бақылау мамандардың маңызды міндеттерінің бірі болып табылады.
- Жүрек-тамыр жүйесін бақылау
Ауыр халдегі науқастардың жүрек-қантамыр жүйесі де әлсірейді. Науқастың артериалды қысымын, жүрек соғысының жиілігін, пульсын бақылау – оның өмірін сақтап қалудағы басты шаралардың бірі. Мұндай жағдайда дәрігерлердің кәсіби біліктілігі мен жедел шешім қабылдауы маңызды рөл атқарады.
- Тағам және сұйықтық беру
Көп жағдайда ауыр халдегі науқастарды жасанды жолмен тамақтандырады. Оларға қажетті тағамды және сұйықтықты енгізу, ағзаға қажетті заттармен қамтамасыз ету арқылы метаболизмді қолдау маңызды. Сұйықтық теңгерімін сақтап, су-электролит алмасуын бақылау қажет, өйткені ағзадағы өзгерістер науқастың жағдайына тікелей әсер етеді.
- Гигиеналық күтім
Ауыр халдегі науқастардың терісін таза ұстау және инфекциялардан қорғау маңызды. Науқастың денесін таза ұстау, төсекке жату жағдайында терінің қажалуын болдырмау, түрлі жағымсыз иістердің пайда болуын алдын алу, және инфекциялардың таралуын шектеу – маңызды міндеттердің бірі.
- Психологиялық қолдау
Науқас қиналған сәтте оны қолдап, эмоционалдық тұрақтылығын сақтауға көмектесу қажет. Реанимация бөлімінде жатқан науқастар жиі үрей, қорқыныш, алаңдаушылық сезінеді. Мұндай жағдайда олармен сөйлесіп, қолдау көрсету қажет, ал психологиялық көмек көрсету арқылы пациенттің жағдайын жеңілдетуге болады.
Қорытынды
Ауыр халдегі науқастарға күтім жасау – бұл үлкен жауапкершілікті талап ететін жұмыс. Әрбір науқастың өмірі үшін жауапкершілік пен адамгершілікті жоғалтпай, медициналық қызметкерлердің кәсіби шеберлігі мен мейірімін үйлестіре отырып, ауыр халдегі науқастарға сапалы күтім көрсету – олардың денсаулығын қалпына келтіруде маңызды қадам.
