Республикалық қоғамдық-медициналық апталық газеті

Елордалық дәрігерлер израильдік әріптестерінің тәжірибесін үйренуде


15 апреля 2016, 05:11 | 1 109 просмотров


Астаналық дәрігерлер жедел медициналық жәрдем жұмысы саласында Израильдің жетекші клиникаларында білім алды.

Халықаралық тәжірибені үйреніп келген дәрігерлер алдағы уақытта өз білімдерімен және тәжірибелерімен қалалық жедел жәрдемнің басқа қызметкерлерімен бөліспек, деп хабарлайды Қазақпарат astana.kz сілтеме жасап.

Астана қаласының Оқу-клиникалық орталығының кешенді жоспарына сәйкес, қалалық Жедел медициналық жәрдем станциясындағы әріптестерінің озық тәжірибесін үйрену мақсатында елордалық Денсаулық сақтау басқармасының бастамасымен бір топ дәрігер Изральдің жетекші клиникаларына оқуға жіберілді.

Оқу барысында отандық мамандар жалпы медициналық қызмет көрсетуден басқа, донорлықты ұйымдастырып, халыққа алғашқы көмек көрсету жолдарын үйрететін Израиль ұлттық шұғыл көмек көрсету қызметінің жұмысымен танысты.

- Қызметкерлер оқуы керек, шетелге барып, тәжірибе жинайды, басқа мемлекеттерде жұмыстардың қалай жүргізілетінін біліп, халықтың жедел жәрдемге қалай қарайтынымен танысуға тиіс. Теледидардан көріп, естіген басқа, қызметімізді дамыту үшін осындай сапарлар қажет. Израильде дәрігерлердің жұмысы жолға қойылған, медиктер келгенше шұғыл көмек көрсететін волонтерлар да жақсы жұмыс істейді, - дейді Астана қаласы жедел медициналық жәрдем стансасы медицина бөлімі бас дәрігерінің орынбасары Сұлушаш Әбілқасымова.

Оның пікірінше, тәжірибе алмасу практикасын тар шеңберлі маманданған және орта медицина қызметкерлерінің, фельдшерлердің де арасында қолданып, тренингтер өткізу үшін шетелдік мамандарды елордаға шақыру керек.

Астана дәрігерлері Тель-Авив қаласындағы ауруханаларда, симуляциялық тренинг-орталықтарында, парамедиктерді оқыту орталықтарында болып, көру алаңында нақты бір жағдайда бірінші кезектегі және біркелкі іс-шараларды (емдеу, профилактикалық, эвакуациялық) қажет ететін зардап шеккендер мен науқастарды топтарға бөлу - «триаж» медициналық топтау негіздерімен танысты.

Айта кетейік, жақын арада Израильге барып келген дәрігерлер елордалық әріптестеріне арнап шеберлік дәрісін өткізеді.

Автор:
ЖД ақпарат