11 декабря 2015, 03:52 | 2 551 просмотр
Бұрынғы шешімді қате санайды
Премьер-министр Беата Шидлоның кабинеті үшін ең бастысы – Польша мен поляктардың қауіпсіздігі. Бұл мәселеде біз ешқандай бітімге бармаймыз, дейді Мариуш Блащак.
25 қазанда өткен парламенттік сайлаудың қорытындысы бойынша құрылған Польшаның жаңа үкіметі бұрынғы биліктің Еуроодаққа келіп жатқан мигранттар ішінен 7 мың босқынды елге қабылдау туралы ұйғарымын қате шешім деп есептейді. Бұл туралы таяуда поляк радиосына республика ішкі істер министрлігінің басшысы Мариуш Блащак хабарлаған.
Бұрынғы үкіметтің 7 мың босқынды қабылдау туралы шешімі қателік болды. Беата Шидло кабинеті үшін ең бастысы, Польша мен поляктардың қауіпсіздігі. Бұл мәселеде біз ешқандай бітімге бармақ емеспіз, деп атап көрсеткен министр.
Өткен жұма күні Брюссельде болған ішкі істер министрліктері басшыларының кездесуінің қорытындыларына түсінік бере келіп, Блащак Еуропалық одақ азаматтарына тәуекелді бағалау тұрғысынан бақылау жасау жөнінде шешім қабылданғандығын атап өткен. Оның айтуынша, кімнің қатер төндіріп, кімдердің қатер төндірмейтіндігін шекара күзеті анықтайтын болады. Біз соңғы жылдары жойылып кеткен шекара күзеті бекеттерін қайтадан қалпына келтіруге тырысатын боламыз, деп түйіндеген сөзін М.Блащак.
Неміс бизнесі алдағы жылға алаңдаушылықпен қарайды
Қытайдағы, Бразилия мен Ресейдегі экономикалық көрсеткіштердің төмендеуі, сондай-ақ, Еуропадағы миграциялық дағдарыстың зардаптары мен болашақтың бұлыңғыр күйде болуы неміс компанияларына оптимистік көңіл-күй әкеле алмай отыр.
Қытайдың, Бразилия мен Ресейдің экономикаларының әлсіреуіне байланысты, сондай-ақ, миграциялық дағдарыс себептерінен неміс бизнесі 2016 жыл перспективаларына асқан ұстамдылықпен баға беруде. Оған Кельндегі Неміс экономикасы институтының өткен дүйсенбі күні жарияланған зерттеулері дәлел. Сарапшылар Германияның ішкі жалпы өнімі алдағы жылы 1,5 пайызға ғана өседі деген болжам жасап отыр.
Сарапшылар Меркель басқарған 10 жылдың ГФР экономикасына қалай әсер еткенін анықтаған.
Сұрау салынған кәсіпкерлер 2016 жылы экономикалық көрсеткіштердің өсетіндігіне қатысты оншалықты оптимизм таныта қоймаған. Олардың тек төрттен бірі ғана экспорт көлемі ұлғаяды деп үміттенеді. Ал үстіміздегі жылдың көктемінде мұндай адамдар сұрау салынғандардың үштен бірін құраған болатын. Ал компаниялардың 38 пайызы ғана өндіріс көлемі арта түседі деп есептейді. Бұл көрсеткіш те бұған дейін 43 пайызды құраған болатын.
Соған қарамастан сауалнамаға қатысқандардың 28 пайызы 2016 жылы өз кәсіпорындарының штатын кеңейтуге ниетті болса, тек 17 пайызы ғана оны қысқартпақ ойда. Босқындар ағынына байланысты экономистер жұмыссыздық деңгейінің де аздап өсе түсетініне болжам жасап отыр.
Айта кету керек, жүргізілген зерттеулерге 3 мыңға жуық неміс компаниялары қатысқан.
Концерн өз шығындарын қысқартпақ
Немістің Wolkswagen концернінің 2016 жылға арналған инвестициялық жоспарына сәйкес, компания алдағы жылы күрделі шығындарын 1 млрд.еуроға қысқартпақ.
Мұндай шешім биыл компания төңірегінде туындаған «дизель дауы» әкелген шығындарды жабу үшін қаржы үнемдеу мақсатында қабылданып отыр.
Өткен жылы алдағы бес жыл бойына жыл сайын 13 млрд. доллардан жұмсалады деп жариялағанымен Wolkswagen компаниясының келер жылғы ең үлкен шығыны 12 млрд.еуроны құрайтын болады, деп жазады Financial Times басылымы.
Финляндияда жұмыссыздық өсуде
Финляндия статистикалық орталығының мәліметтері бойынша, үстіміздегі жылдың қазан айында бүкіл халқының саны бес жарым миллионға да жете қоймайтын елдегі жұмыссыздар қатары 234 мың адамды құраған. Бұқаралық ақпарат құралдарының хабарлауынша, бұл 2014 жылғы көрсеткіштен 14 мыңға көп.
Осылайша, Финляндиядағы жұмыссыздық деңгейі бір жыл ішінде 0,4 пайызға өсіп, 8,7 пайызды құраған. Сонымен бірге, әйелдердің жұмыспен қамтылу деңгейінің 2 пайыз дерлікке өскені де белгілі болып шықты.
Жұмыс істейтін әйелдер үлесі 68,7 пайызға тең болса, жұмыс істейтін ерлер үлесі одан сәл азырақ, яғни 68 пайызды құрап отыр.
Осы орайда, еңбек және экономикалық даму министрлігіндегі мәліметтердің өзгеше екенін де айта кету қажет. Аталмыш ведомствоның мәліметтері бойынша, өткен қазан айында Финляндиядағы жұмыссыздар саны 338 мың адамды құраған. Еңбек және экономикалық даму министрлігі мен статистикалық орталық мәліметтерінің арасындағы айырмашылық мәліметтерге статистикалық есеп жүргізудің түрлі әдістемелерімен түсіндіріліп отыр.
Еуропа елдері арасында жұмыссыздықтан зардап шегіп отырған тек Финляндия ғана емес. Мәселен, Литвада бұл көрсеткіш Еуропалық одақ бойынша орташа көрсеткіштен де асып кеткен. Бұл жөнінде RuBaltic.Ru. хабарлап отыр.
Жасалған келісім заңсыз деп танылып отыр
Glencore компаниясының Ливия мұнайын экспорттау туралы мәмілесі заңсыз болып табылады. Бұл туралы компанияға ел үкіметі хабарлаған.
Өткен аптада компания халықаралық қауымдастық исламистер қолдауындағы үкімет орналасқан деп есептейтін Триполи ұлттық мұнай компаниясының батыс бөлімшесінен Ливия мұнайы экспортының тең жартысын сатып алу жөнінде келісімшарт бекіткен болатын. Дегенмен, Шығыс Ливияда орналасқан Бенгазидегі халықаралық деңгейде мойындалған үкімет Glencore компаниясы заңсыз түрде келісімшарт жасасты деп мәлімдеп отыр.
Ұлттық мұнай компаниясы шығыс бөлімшесінің басшысы Наги Эльмаграби Bloomberg агенттігіне берген сұхбатында өзінің Glencore компаниясынан түсініктеме талап еткенін, бірақ әзірге ешқандай жауап алмағанын атап көрсеткен.
Ол егер Glencore компаниясы Триполидегі қосарласқан режім-
мен келісімшартқа қол қоятын болса, онда Бенгази үкіметінің компания танкерлерінің ливиялық порттарды пайдалануына кедергі келтіруі мүмкін дегенді де ескерткен.
Қол қойылған келісімде Glencore компаниясының Sarir & Messla кен орнынан мұнай алатындығы және оны өткізу үшін сатып алушылар іздейтіндігі қарастырылған. Ал ол Ливияның шығысындағы Тобрук порты арқылы экспортталуы тиіс.
Шығыстағы үкімет болса, өздерінің Триполи үкіметімен қол қойылған ешқандай келісімді мойындамайтындықтарын мәлімдеп отыр.
Ливия 2011 жылы Каддафиді тақтан құлатумен аяқталған азамат соғысына дейін тәулігіне шамамен 1,6 миллион баррель мұнай өндіріп келген. Содан бері өндіріс көлемі тәулігіне 400 мың баррельге дейін төмендеді. Дегенмен, егер Ливиядағы ахуал мен қауіпсіздік жақсарар болса, бұл көлемнің айтарлықтай өсе түсуі де мүмкін.
Айта кету керек, Glencore әр кезде де қауіпсіздік пен саяси тәртіпсіздіктер саласындағы тәуекелдер былайғы инвесторлар үшін кедергі болып саналатын елдерге инвестиция салумен келеді. Ондай елдердің қатарында Конго Демократиялық Республикасы мен Колумбия бар. Соған қарамастан, Қытай экономикасындағы өсу қарқынының төмендеуі шикізатқа әлемдік бағалардың төмендеуіне алып келгендіктен компания жаңа табыс көздерін іздеуге мәжбүр болып отыр, деп жазады The Guardian басылымы. Сонымен бірге, соңғы бірнеше жылда компания акцияларының өз құнын айтарлықтай жоғалтқанын да еске сала кеткен жөн.