Республикалық қоғамдық-медициналық апталық газеті

АМЕРИКАЛЫҚ ҒАЛЫМДАР ЖОҒАРЫ БАҒА БЕРДІ


11 сентября 2015, 10:30 | 1 424 просмотра



Қазақ онкология және радиология ғылыми-зерттеу институтына Питтсбург университеті медициналық орталығы (UPMC) мен Назарбаев университетінен арнайы делегация келіп, Қазақстандағы онкология қызметімен және институт жұмысымен танысып қайтты.

Шетелдік 13 ғалым 2 күн бойы отандық онкология қызметінің құ­ры­лымы, қатерлі ісікті ерте сатысында анықтау бағдарламалары және тіркеуге алу жүйесімен танысты. Қонақтар онкоинституттың негізгі ба­ғыттары туралы ақпарат алып, түрлі бөлімдер мен орталықтар жұмысын бақылады. Скрининг бағдарламалары бойынша да өзге қалалық емха­наларға бас сұқты. Сапар соңында АҚШ-тан келген делегацияны Денсаулық сақтау және әлеуметтік даму вице-министрі Александр Цой қабылдап, екіжақты келіссөздер жүргізді. Нәтижесінде, екі ел ара­­сында алдағы уақытта тығыз қарым-қатынас орнап, біріккен жобалар іске асы­рылатын болды. 

UPMC – АҚШ-тағы Денсаулық сақтау саласындағы үздік әрі коммер­циялық емес ұйым. Бұл ұйым әлемдік медициналық мекемелер мен орта­лықтардың басын біріктірген. Штатында 60 000 қызметкері бар. Жалпы, 20 аурухана қызметін орталықтандырып отыр. UPMC науқастар күтімін жақсарту мен тиімділігін арттыру үшін жаңа жүйелерді ойлап табумен айналысады. 

Бұл ұйым Астана қаласында Ұлттық ғылыми онкологиялық орталық құру жобасы бойынша Назарбаев университетінің стратегиялық әріптесі саналады. 2017 жылға жоспарланған жоба ҚР Президенті Н.Назарбаевтың 2012 жылғы Жолдауы негізінде жүзеге аспақ.

 – Жалпы, UPMC делегациясы еліміздің бас онкологы, Онкология және радиология ҚазҒЗИ институт директоры Қ.Нұрғазиевке және бірқатар онколог-мамандарға алғыс білдіріп, отандық онкологияның бү­гінгі деңгейін жоғары бағалады. Біздің қызметіміздегі оң өзгерістерді атап айтты. Одан бөлек шетелдік және отандық мамандар екі елдің онкология саласындағы айырмашылықтарын да сөз етті. Жиын соңында болашақ­тағы әріптестік мәселесі де күн тәртібінде қаралды, – дейді Қазақ онко­логия және радиология ҒЗИ директорының стратегиялық мәселелер бойын­ша орынбасары Дәулет Байпейісов. 

Айта кетейік, ресми мәліметтерге сүйенсек, 2015 жылдың 1-қаң­тарын­дағы есеп бойынша 150 436 қазақстандық онкоаурулар есебінде тұр. 2013 жылы бұл көрсеткіш 146 404 болған еді. Мамандардың айтуынша, қатерлі дертке шалдыққандар санының көбеюі обырды алғашқы сатысында анықтау мүмкіндігінің артуымен тікелей байланысты. Республика бойын­ша жыл сайын қатерлі ісіктен 17000 мың адам көз жұмады. Өлім-жітім бойынша онкологиялық аурулар екінші орында.

Автор:
Нұрсұлу МЫРЗАХМЕТОВА. «Айқын».