17 октября 2014, 11:25 | 2 581 просмотр
Бүгінде еліміздегі онкологиялық аурулардың ішіндегі ең кең таралғаны сүт безі қатерлі ісігі болып отыр. Ал қатерлі аурулар арасында сүт безі ісігінен көз жұматын әйелдер саны үшінші орында тұр, яғни 1,5 мың әйелді құрайды.
Онколог мамандардың айтуынша, жыл сайын республика бойынша 4 мыңға жуық сүт бездерінің қатерлі ісігі анықталады екен. Қазір есепте тұрған әйелдер саны 27 мыңға жуық. Ал көбіне сүт безі қатерлі ісігі асқынып кеткен жағдайда келген әйелдің омырауын түгелдей алып тастауға тура келеді екен. Алайда енді мамандарымыз оны омырау имплантантымен алмастыруды қолға алып жатыр.
Бұл әрине, біздің елімізде ғана емес, өзге мемлекеттерде де өткір тұрған проблема. Сондықтан сүт безі қатерлі ісігімен күресудің Дүниежүзілік күніне орай 9-10 қазан күні Алматы қаласында сүт бездерінің қатерлі ісігі мәселелеріне қатысты халықаралық конференция өтуде. Конференцияға Италия, Испания, Ресей, Өзбекстан, Қырғызстан, Түркия елдерінің алдыңғы қатарлы сарапшылары қатыспақ. Оның ішінде профессор Умберто Веронези басқаратын Европалық онкология институтының (Милан, Италия) танымал профессорлары бар.
Қазір Қазақстанда сүт безі қатерлі ісігі жасарып келе жатқанын айтты. Алматы қалалық онкологиялық диспансердің бас дәрігері Диляра Қайдарова. Яғни, ауру 28-30 жасында анықталуда. Негізінен, әйелдердің 20-25 пайызы аурудың асқынғанында, 3-4-сатысында келеді екен.
– Бізде сүт безі қатерлі ісігіне күніне шамамен 4 операция жасалады. 3 операция қауіптілігі төменге жасалады. Жалпы, Алматы қаласында сүт безі ісігімен ауыратын әйелдердің саны 400-ге жуық. Мысалы, профессор Умберто Веронези басқаратын Еуропалық онкология институтында органды сақтап қалу операциялары бар. Ондағы мамандар омырауды алып тастағанның өзінде, оның орнына омырау импланттары салынады. Бұл әдісті біздің жас дәрігерлеріміз де меңгеріп келді. Енді мұндай операцияны біздің орталықта да жасаймыз. Импланттардың бағасы 600-900 евродан жоғары, ол мемлекет қаржысына алынбақ, – дейді Қалалық онкологиялық диспансердің бас дәрігері Диляра Қайдарова.
Бүгінде әлемде жылына 1 млн 400 мың науқас анықталады екен. Ал Италия, Ұлыбритания, Германия, Англияда бұл көрсеткіш жылына 33 мыңды құрайтынын айтады профессор, Еуропалық онкология институтындағы сүт безі хирургиясы және диагностикасы департаментінің директоры Стефано Зуридо (Милан, Италия).
– Негізі сүт безі қатерлі ісігіне шалдығатындардың қатары көбейгенімен, өлім-жітімнің саны жыл сайын азайып келеді. Ол әйелдердің өз денсаулығына жауапкершілікпен қарай бастағаны білікті мамандар даярлануымен байланысты. Сондай-ақ, құрылғылар да жылма-жыл жаңарып, жетілдіріліп келеді. Еуропа елдерінде омырауды түгелдей кесіп тастамай, көп жағдайда дәрігерлер оны сақтап қалуға тырысады. Өкінішке қарай, бұл пайыз Шығыс Еуропа, Азия елдерінде көп. Әйелдер өзіне көңіл бөлмей, дәрігерге омырауды сақтап қалу мүмкін емес жағдайда барады, – дейді Стефано Зуридо.
Дегенмен, Ұлттық скринингтік бағдарламаның арқасында Қазақстанда бұл ауруды ерте басынан анықтау және дер кезінде емдеу мүмкіндігі артып отырғандығын айтады мамандар. Мысалы, осы жылдан бастап Алматы онкология орталығында сүт бездерінің қатерлі ісігін жаңа заманауи технологияны қолданып емдеуде. Ал сүт бездерінің қатерлі ісігін ерте кезеңінде анықтаса, аурудан 98 пайыз жазылып кету мүмкіндігі бар екен.
– Сүт безі ісігін ерте анықтаудың тәсілі маммографиялық скриниг жасау. Әрбір жасы 40-тан асқан әйел тұрғылықты жеріне байланысты емханаларда тегін скриниг өтуіне болады. Бірінші саты бойынша диагностика жасалады, одан барып биопсия алынады, кейін гистологиялық зерттеулер жүргізіледі. Содан барып аурудың сатысына байланысты емдеу жұмыстарына кірісеміз. Қуантатыны, ерте кезеңде, яғни 1-2-сатысында анықталғандар саны артып келеді, ол шамамен 85 пайызды құрайды. Ал бірінші сатысында адамды 100 пайыз емдеп шыға аламыз. Екінші сатысында химия терапия, сәуле терапиясы әдістері жүргізіледі. Одан басқа, гармон терапиясы, таргет терапиясы бар. Таргет терапиясы қызметі елімізде тегін жүргізіледі, – дейді Диляра Хайдарова.
Алманы қаласында жүргізілген «Сіз үшін маммологқа баруға не кедергі?» деген сауалға, әйелдердің 49 пайызы бос уақытының жоқтығын айтса, 23 пайызы ештеңе мазаламаса барудың қажеті жоқ деп түсінеді екен. 12 пайызы денсаулығына байланысты жағымсыз жаңалық естуден үрейленеді екен.
Айта кету керек, БДС ұйымы қазан айында сүт безінің қатерлі ісігі туралы хабарландыруды арттыруға арнап отыр. Қазан айының 18-де барлық емханаларда және Қалалық онкологиялық диспансерде ашық есік күні жүргізілмек.