Авторлар: Кизбаева Ботакоз Джумановна Травматология бөлімінің ота мейірбикесі, Калыкова Гульнара Кабыловна Хирургия бөлімінің мейірбикесі, Жетісу облысы ММ ШЖҚ «Панфилов ауданаралық көпсалалы ауруханасы» КМК
Балалар хирургиясы — балалардың туа біткен немесе жүре пайда болған ауруларын, жарақаттарын және басқа да хирургиялық патологияларын емдеумен айналысатын медицина саласы. Бұл бағыт жалпы хирургиядан біршама ерекшеленеді, өйткені балалардың ағзасы ересектерден өзгеше дамиды және әр жаста әртүрлі физиологиялық ерекшеліктерге ие болады.
Балалар хирургтары тек хирург емес, сонымен қатар бала психологиясын жақсы білетін маман болуы керек. Себебі операция алдында және кейінгі күтімде баламен дұрыс қарым-қатынас орнату өте маңызды. Операциядан қорқу, ата-анасынан ажырау сияқты жағдайлар баланың жағдайына әсер етуі мүмкін.
Балалар хирургиясында жиі кездесетін ауруларға мыналар жатады:
— Туа біткен кемістіктер: ерін мен таңдайдың жырығы, крипторхизм (еннің түспеуі), туа біткен жүрек ақаулары.
— Жүре пайда болған аурулар: соқыр ішек қабынуы (аппендицит), шап жарығы, ішек түйілуі.
— Жарақаттар: сүйек сынуы, күйіктер, жұмсақ тіндердің жарақаттары.
Хирургиялық ем көбінесе науқастың өмірін сақтап қалуға немесе оның сапасын жақсартуға бағытталады. Мысалы, туа біткен жүрек ақауларын дер кезінде ота жасау арқылы бала қалыпты өмір сүруге мүмкіндік алады.
Қазіргі таңда медицинаның дамуы арқасында көптеген операциялар аз инвазивті әдістермен, яғни үлкен тілік жасамай, арнайы құралдар арқылы жүзеге асырылады. Бұл әдістер баланың тез сауығып кетуіне көмектеседі және асқыну қаупін азайтады.
Балалар хирургиясы – үлкен жауапкершілікті талап ететін сала. Әрбір операция – болашаққа жасалған қадам. Сондықтан бұл саладағы мамандар жоғары білімді, тәжірибелі және ерекше мейірімді болуы тиіс.
Ата-аналарға кеңес: егер балаңызда қандай да бір хирургиялық мәселе туындаса, уақытында дәрігерге қаралыңыз. Ерте анықталған ауру – сәтті емделудің кепілі.
