Авторлар: Бағаева Түйғын Молдалиқызы, перзентхана бөлімінің аға мейірбикесі, ШЖҚ «Райымбек аудандық ауруханасы» КМК;
Битибаева Гүлим Бекетайевна, медбике, ШЖҚ МКК «Көксу аудандық ауруханасы»;
Кулдарова Айида Тутиновна, медбике, «Үміт» мүмкіндігі шектеулі балаларға арналған күндізгі болу орталығы
Кіріспе
Ана мен бала денсаулығы — қоғамның басты байлығы мен болашағының кепілі. Жаңа өмірдің басталуы тек физиологиялық процесс қана емес, ол — нәзік әрі жауапты кезең. Осы кезеңде ана мен нәрестеге дұрыс күтім мен қолдау көрсету — денсаулықтың, тыныштықтың және болашақтағы салауатты ұрпақтың негізі.
Мейірбике — осы маңызды кезеңнің көзге көрінбейтін, бірақ шешуші тұлғасы. Ол тек медициналық көмек көрсетіп қана қоймай, ананың сенімді тірегі, баланың алғашқы қамқоршысы ретінде қызмет атқарады.
Ана мен балаға кешенді күтім дегеніміз не?
Кешенді күтім — бұл медициналық, психологиялық, гигиеналық, ақпараттық және әлеуметтік қолдауды біріктіретін, ана мен балаға бағытталған жан-жақты көмек жүйесі.
Ол мына бағыттарды қамтиды:
Босануға дейінгі күтім (пренатальды кезең):
– Жүктілікті бақылау, УДЗ, талдау алу, кеңес беру;
– Жүкті әйелге дұрыс тамақтану мен өмір салты бойынша нұсқаулық беру;
– Аяғы ауыр әйелдің эмоциялық жағдайына назар аудару.
Босану кезеңі:
– Ананың физикалық жағдайын бақылау;
– Босану процесінде мейірімді психологиялық қолдау көрсету;
– Асептикалық талаптарды қатаң сақтау.
Босанғаннан кейінгі күтім (постнатальды кезең):
– Баланың тыныс алуы, дене қызуы, сору рефлексін бақылау;
– Анаға емшекпен емізу техникасын көрсету, лактацияны қолдау;
– Жараларды өңдеу, жатырдың жиырылуын бақылау;
– Босанғаннан кейінгі депрессияның алдын алу.
Мейірбикенің негізгі міндеттері
- Медициналық бақылау
Ана мен баланың өмірлік көрсеткіштерін бақылау (қан қысымы, температура, тыныс);
Қан кетудің алдын алу және ерте анықтау;
Баланың салмағын, рефлекстерін, тері жабындарын бағалау.
- Гигиеналық күтім
Ана мен балаға арналған тазалық шараларын орындау (жуындыру, жөргек ауыстыру);
Перзентханадағы санитарлық-гигиеналық талаптарды сақтау.
- Психологиялық қолдау
Жаңа босанған ананың қобалжуын, қорқынышын жеңуге көмектесу;
Жылы, түсіністікпен сөйлесу арқылы ананың сенімін арттыру.
- Кеңес беру және білім беру
Босанғаннан кейінгі күтім, емізу, тамақтану, контрацепция туралы ақпарат беру;
Қауіпті белгілер туралы хабарлау (қызу, ісік, ауырсыну, нәрестенің енжарлығы).
Ерекше жағдайларда күтім ерекшелігі
Мүмкіндігі шектеулі ана немесе бала: мейірбике бұл жағдайда ерекше тәсіл мен шыдамдылық танытуы тиіс.
Шала туған нәресте: температураны сақтау, тыныс алуын бақылау, ерте бейімделуге көмектесу қажет.
Әлеуметтік тұрғыдан әлсіз отбасылар: мейірбике әлеуметтік қызметкерлермен тығыз жұмыс істеп, ана мен баланың қауіпсіздігін қамтамасыз етуге атсалысады.
Қорытынды
Ана мен балаға бағытталған кешенді күтім — бұл тек қызмет емес, бұл — жанашырлық, мейірім мен кәсіби жауапкершілік.
⠀
Мейірбике осы жүйеде жан-жақты көмек көрсететін, көп салалы қолдаудың тірегі болып табылады. Оның әрбір іс-әрекеті — жаңа өмірдің қауіпсіз басталуына қосқан үлес.
Сау ана – дені сау бала. Денсаулығы мықты бала – жарқын болашақ.
