Алматыдағы Кардиология және ішкі аурулар ғылыми-зерттеу институтында шеберлік сабағы аясында еліміздің интервенциялық кардиологтары жетекші шетелдік мамандармен бірлесе отырып күрделі операцияларды сәтті жүзеге асырды. Испаниядан келген доктор Хосе Ф. Диас Фернандес және Австриядан доктор Аурель Тома алғаш рет Алматыда соңғы буын өздігінен кеңейетін клапан орнату арқылы TAVI операцияларын жасады. Сондай-ақ, дәрі-дәрмекпен қапталған баллондарды пайдаланып, коронарлық артерияларға күрделі араласулар жүргізілді.
Инновациялық әдістер – науқастар үшін жаңа мүмкіндік
TAVI (транскатетерлі қолқа қақпақшасын имплантациялау) әдісі қолқа қақпақшасының ашық хирургиясынсыз ауыр қолқа стенозын емдеуге арналған. Бұл әдістің артықшылығы – инвазивтіліктің төмендігі мен арнайы имплантацияланған клапандардың тиімділігі.
Жаңа буын транскатетерлі жүйе икемді жеткізу механизмінен және өздігінен кеңейетін клапаннан тұрады. Навитор – өзіндік ашылу қабілетіне ие жалғыз клапан, ол операцияның қауіпсіздігін қамтамасыз етіп, асқыну қаупін барынша азайтады.
Қазіргі заманғы кардиохирургиядағы жаңа трендтер
Шеберлік сабағы барысында отандық мамандар коронарлық артериялардың зақымдануын емдеудің заманауи тәсілдерімен танысу мүмкіндігіне ие болды. Дәрі-дәрмекпен қапталған баллондарды қолданудың кеңеюі интервенциялық кардиологиядағы жаңа трендтердің бірі болып табылады. Бұл технология созылмалы окклюзияларды емдеуде тиімділігі дәлелденген және кей жағдайларда стенттеу қажеттілігін болдырмайды.
Қазақстан медицинасының дамуы
Кардиология және ішкі аурулар ғылыми-зерттеу институтының басқарма төрағасы Марат Пашимов еліміздегі медицина саласының қарқынды дамып келе жатқанын атап өтті:
«Испан және австриялық әріптестеріміз – әлемдік деңгейдегі мамандар. Біз оларды озық технологиялармен тәжірибе алмасу мақсатында шақырдық. Қазақстан медицинасы халықаралық стандарттарға сай дамып келеді. Осындай күрделі операцияларды тек жоғары білікті мамандар орындай алады. Бізде қажетті құрал-жабдықтар мен тәжірибелі дәрігерлер бар».
Институттың рентгеноперациялық бөлім меңгерушісі Алексей Колесников инновациялық технологиялардың науқастардың өмір сүру сапасын жақсартатынын атап өтті:
«Біз күрделі оталарды сәтті жүзеге асырып келеміз. Институт басшылығының қажетті материалдармен толық қамтамасыз етуінің арқасында операцияларды жоғары деңгейде орындай аламыз. Операциядан кейін жүрек толық қалпына келеді, науқастар ентігуден және ауырсынудан арылады, өмір сапасы айтарлықтай жақсарады».
Шеберлік сабағы аясында төрт ота сәтті жасалды, олардың бірі 84 жастағы науқасқа жүргізілді. Барлық операциялар оң нәтижемен аяқталды.
